ბილ გეითსი Microsoft-ის დირექტორთა საბჭოს ტოვებს

Photo Credits to Jack Taylor/Getty Images

2020 წლის 13 მარტს ამერიკელმა მილიარდელმა ბილ გეითსმა კომპანიების Microsoft-ისა და Berkshire Hathaway-ის დირექტორთა საბჭოები დატოვა. საკუთარი გადაწყვეტილების მიზეზად გეითსი ისეთ ფილანტროფიულ პრიორიტეტებზე კონცენტრირების სურვილს ასახელებს, როგორიცაა გლობალური ჯანმრთელობა, განათლება და კლიმატის ცვლილებასთან ბრძოლა.

თანამდებობების დატოვებასთან დაკავშირებით ინფორმაცია ბილ გეითსის მიერ პლატფორმა Linkedin-ზე გამოქვეყნებული განცხადებიდან გახდა ცნობილი, რომელშიც ბიზნესმენი აღნიშნავს, რომ Microsoft-ისა და Berkshire Hathaway-ის მენეჯმენტი არასდროს ყოფილა უფრო ძლიერი, ვიდრე ახლა და ამ ნაბიჯის გადადგმისათვის დრო შესაფერისად მიაჩნია. მიუხედავად ოფიციალური თანამდებობის დატოვებისა, გეითსი Microsoft-თან თანამშრომლობის გაგრძელებას გეგმავს.

„რაც შეეხება Microsoft-ს, საბჭოს დატოვება არავითარ შემთხვევაში არ ნიშნავს კომპანიასთან კავშირის გაწყვეტას. Microsoft-ი ყოველთვის იქნება ჩემი ცხოვრებისეული შემოქმედების მნიშვნელოვანი ნაწილი და მე გავაგრძელებ მონაწილეობას სატიასა და ტექნიკურ ლიდერშიფთან ერთად კომპანიის ხედვის ფორმირებასა და კომპანიის ამბიციური მიზნების მიღწევაში.“ – ნათქვამია გეითსის განცხადებაში.

ოფიციალური განცხადება გაავრცელა Microsoft-მაც, სადაც აღნიშნულია, რომ 2007 წლის 27 ივნისიდან მოყოლებული გეითსი ჩამოშორდა კომპანიის ყოველდღიურ საქმიანობას, რათა მეტი ყურადღება დაეთმო საქველმოქმედო ფონდის Bill & Melinda Gates Foundation საქმიანობისათვის. ფონდის პირველად მიზნებს ჯანდაცვის ხელმისაწვდომობის გაზრდა და უკიდურესი სიღარიბის შემცირება წარმოადგენს. აღსანიშნავია, რომ ფონდმა გასულ თვეში 100 მლნ დოლარი დახარჯა კორონავირუსის საწინააღმდეგო აქტივობაზე.

No Comments Yet

Leave a Reply

Your email address will not be published.