Apple Watch-ს  დეპრესიის შესასწავლად გამოიყენებენ

UCLA-მა Apple-თან პარტნიორობით დეპრესიის შესწავლა დაიწყო.  კვლევა სამ წელს გასტანს და მისი მიზანია, ობიექტური და ზუსტი გაზომვებით ადამიანებს დაეხმაროს დეპრესიის გამოვლენასა და მკურნალობაში.

ფოტო: Apple Insider

სამწლიანი პროექტი იწყება საპილოტე ეტაპით, რომელშიც ჩართულია UCLA-ის აკადემიური ჯანმრთელობის ცენტრის 150 პაციენტი. კვლევის მონაწილეთა რაოდენობის გაზრდა 3000 ადამიანამდე იგეგმება. მკვლევრები მთელი პროექტის განმავლობაში მონაცემების შეგროვების მიზნით მონაწილეების ინტერვიუებთან და კითხვარებთან ერთად  iPhone-ს, Apple Watch-ს და Beddit sleep tracker-ს გამოიყენებენ. ამასთან, მათი კვლევის ობიექტია ისეთი ფაქტორები, როგორებიცაა ვარჯიში, პულსი, დეპრესიისა და შფოთვის სიმპტომები.

UCLA-ის განცხადებით, პაციენტის მონაცემები გაანალიზდება უსაფრთხო გარემოში, რომლის მონაცემებთან მხოლოდ UCLA-ის მკვლევრებს ექნებათ წვდომა. აღსანიშნავია, რომ მკურნალობის არსებული მიდგომები სრულად ეყრდნობა დეპრესიით დაავადებულთა  სუბიექტურ მოგონებებს.

კვლევა UCLA Grand Challenges–ის საუნივერსიტეტო კვლევითი ინიციატივის ნაწილია, გაუმკლავდეს მსოფლიოს ზოგიერთ უმსხვილეს პრობლემას, მათ შორის დეპრესიას.

No Comments Yet

Comments are closed