Girls Gone International 🇳🇱 თათია ხოშტარია

თათია ხოშტარიას ახლანდელი პროფესია ნამდვილად არ ყოფილა ბავშვობის ოცნება, არც ის იცოდა 16 წლის ასაკში ზუსტად რას მოიცავდა ფინანსები. მისი ოჯახის წევრებიც ძირითადად ხელოვნების სფეროში მოღვაწეობდნენ. მაგრამ ბავშვობიდან უყვარდა ციფრებთან მუშაობა, ტექნიკური საგნებიც აინტერესებდა და შეიძლება ითქვას, კარგადაც გამოსდიოდა.

რამ განსაზღვრა შენი პროფესიული არჩევანი? როგორ მოხვდი ფინანსების სფეროში?

ჩემი ახლანდელი პროფესია ნამდვილად არ ყოფილა ბავშვობის ოცნება, არც ის ვიცოდი 16 წლის ასაკში ზუსტად რას მოიცავდა ფინანსები. ჩემი ოჯახის წევრებიც ძირითადად ხელოვნების სფეროში მოღვაწეობდნენ. მაგრამ ბავშვობიდან მიყვარდა ციფრებთან მუშაობა, ტექნიკური საგნებიც მაინტერესებდა და შეიძლება ითქვას, კარგადაც გამომდიოდა. როდესაც სკოლას ვამთავრებდი კავკასიის ბიზნესის სკოლა -CSB და ბიზნესის სკოლა-ESM იყო ორი წამყვანი უნივერსიტეტი, სადაც კარგი განათლების მიღება იყო შესაძლებელი. ასე რომ ბევრი არ მიფიქრია და CSB-ში გავაგრძელე სწავლა. თავიდან მარკეტინგი ავირჩიე ძირითად მიმართულებად, მაგრამ მალევე შევიცვალე აზრი და ფინანსებით ჩავანაცვლე. სწავლის დამთავრების შემდეგ შევუერთდი კომპანია „იუაი“-EY თბილისის გუნდს, საიდანაც დაიწყო ყველაზე საინტერესო ეტაპი ჩემს კარიერაში. უკვე 15 წელია EY-ის დიდი ოჯახის წევრი ვარ, ამ წლების განმავლობაში ვიმუშავე საუკეთესო პროფესიონალებთან, უმსხვილეს საერთაშორისო კომპანიებთან და დავაგროვე ძალიან დიდი გამოცდილება და ცოდნა. 10 წლის წინ მომეცა ნიდერლანდებში კარიერის გაგრძელების საშუალება. ახლა ძირითადი ჩემი მიმართულება არის მსხვილი ნიდერლანდური ბანკების, სადაზღვევო და აქტივების მმართველი კომპანიების აუდიტი. ნიდერლანდებში ფინანსური მომსახურების სფერო ძალიან განვითარებულია და უდიდეს როლს თამაშობს ქვეყნის კაპიტალურ ბაზარზე.

საკუთარ შესაძლებლობებში თავდაჯერებულობა დრომ, უნარ-ჩვევებმა და გამოცდილებამ მოგცა თუ ქვეყანამ, სადაც ამჟამად მუშაობ?

ცხოვრების ამ ეტაპზე, შემიძლია თამამად ვთქვა, რომ მჯერა ჩემი შესაძლებლობების. ეს დრომ და გამოცდილებამ მოიტანა. განსაკუთრებით დიდი წვლილი შეიტანა აქ გატარებულმა წლებმა. ნიდერლანდებში ცხოვრების და კარიერის დაწყებამ დამატოვებინა ჩემი კომფორტის ზონა და დამაყენა ძალიან დიდი გამოწვევების წინაშე. ეს პროცესი ადვილი ნამდვილად არ ყოფილა, მაგრამ მგონია, რომ სირთულეების გადალახვის გარეშე ვერ გავიზრდებოდი და ჩამოვყალიბდებოდი პროფესიონალად.

როცა ფინანსურ სექტორში იწყებდი შენს კარიერას, წარმოიდგენდი , რომ შუაგულ ევროპაში ამ პროფესიაში ლიდერი გახდებოდი ?

ყველა ჩვენგანს ალბათ რაღაც ეტაპზე გასჩენია ლიდერობის ამბიცია და არც მე არ ვარ გამონაკლისი. მაგრამ კარიერის დასაწყისიდანვე არ დამისახავს მიზნად, რადგან მეგონა, რომ ლიდერის უნარები არ მქონდა. გარკვეულ ეტაპზე დავრწმუნდი, რომ ადამიანები არ იბადებიან ლიდერებად და ლიდერის თვისებების და უნარების გამომუშავება გამოცდილებასთან ერთად მოდის.

ნამდვილად ვერ წარმოვიდგენდი მრავალი წლის წინ, რომ გავუძღვებოდი ასეთი მსხვილი კომპანიების აუდიტს და შესაძლებლობა მომეცემოდა პერსონალურად წარმედგინა EY ამ კომპანიების მენეჯმენტისა და სამეთვალყურეო საბჭოს წინაშე. ჩემთვის ეს ძალიან დიდ პასუხისმგებლობაა.

როგორ აფასებენ შენს იდეებს და მოსაზრებებს კოლეგები?

რთული კითხვაა, ალბათ ჩემს კოლეგებს და კლიენტებს ჩემზე უკეთესი პასუხი ექნებოდათ ამ კითხვაზე. ჩემი გადმოსახედიდან ვფიქრობ, რომ ჩემი ხმა და ჩემს მიერ გამოთქმული აზრები და იდეები შეესაბამება ჩემი კოლეგებისა და კლიენტების მოლოდინებს.

შენი აზრით, რა უნარ-თვისებები გაქვს ისეთი, რაც გამოგარჩევს საერთაშორისო გამოცდილების მქონე სხვა კოლეგებისგან? როგორ ფიქრობ, რატომ შეაჩერეს ჰოლანდიელებმა ქართველ გოგოზე არჩევანი?

ჩემი აზრით, კოლეგებისგან ყველაზე მეტად განმასხვავებს ჩემი მუშაობის სტილი, ანალიტიკური აზროვნება და რთული სიტუაციების მართვის უნარი. მგონია, რომ ამ ყველაფერს საფუძვლად უდევს თბილისის ოფისში მიღებული გამოცდილება. საქართველოში ვიმუშავე საუკეთესო პროფესიონალებთან და მენეჯერებთან, მათგან ძალიან ბევრი რამ ვისწავლე, რისთვისაც ყოველთვის მადლიერი ვიქნები.

რამდენად მნიშვნელოვანია შენთვის დროის მენეჯმენტი? რთული იყო ისეთ ქვეყანაში ცხოვრების დაწყება, როგორიც ჰოლანდიაა, სადაც ყველაფერი ზედმიწევნით დაგეგმილი აქვთ? 

დროის მენეჯმენტი ნამდვილად არ ყოფილა ჩემი ძლიერი მხარე, რაც სწორედ ნიდერლანდებში ცხოვრების დაწყების შემდეგ გავიაზრე. აქ ყველაფრის დაგეგმვა წინასწარ ხდება. წინასწარ არ ნიშნავს მხოლოდ ერთი კვირით ან ერთი თვით ადრე. მაგალითად, 2024 წლის მნიშვნელოვანი შეხვედრები უკვე დაგეგმილი გვაქვს. მაგრამ ეს არ ნიშნავს, რომ სპონტანურობის ადგილი საერთოდ არ გვრჩება. თავიდან ამ ყველაფერთან შეგუება ძალიან გამიჭირდა, მაგრამ მალევე მივხვდი, რომ აქაურ ცხოვრების სტილთან ფეხის აწყობა მხოლოდ სასიკეთო იქნებოდა ჩემთვის. საბოლოო ჯამში, დროის სწორი მენეჯმენტი მეხმარება ეფექტურად მუშაობაში და საკუთარი თავისთვისაც მეტი დრო მრჩება.

ნიდერლანდები ჩემთვის არის… ქვეყანა, სადაც ჩამოვყალიბდი ზრდასრულ პიროვნებად.

საქართველო ჩემთვის არის … სამშობლო, სადაც დავიბადე და გავიზარდე, სადაც ყველაზე კომფორტულად ვგრძნობ თავს მიუხედავად, ამდენწლიანი განშორებისა.

„არა“ როგორც დაბრკოლება თუ „არა“ როგორც შესაძლებლობა?

„არა“ შეიძლება იყოს დაბრკოლებაც და შესაძლებლობაც, იქიდან გამომდინარე, ჩვენ როგორ აღვიქვამთ და როგორ ვპასუხობთ მას. ჩემთვის უარი იძლევა სწავლის და განვითარების შესაძლებლობებს. უარის შემთხვევაში ვიწყებ ფიქრს, თუ რა შემეშალა და თუ როგორ შეიძლება ამ შეცდომის გამოსწორება. ასევე „არა“ მაძლევს შანსს ვიფიქრო კრეატიულად და ვეძიო სხვა ალტერნატივები ჩემი მიზნის მისაღწევად. მთავარი მესიჯი არის: ვცდილობ „არა“ გამოვიყენო, როგორც სწავლისა და ზრდის შანსი.

რამდენად რთულია შეინარჩუნო პროფესიული და პირადი ცხოვრების ბალანსი?

არც თუ ისე რთულია აქ ამ ბალანსის შენარჩუნება. ნიდერლანდები ერთ-ერთ საუკეთესო ქვეყანაა ამ კუთხით, რასაც ეფექტური და პროდუქტიული მუშაობით მიაღწიეს ჰოლანდიელებმა. სამუშაო დღე ძალიან ადრე იწყება და საკმაოდ დატვირთულია, მაგრამ თავისუფალ დროს და დასვენებასაც დიდი მნიშვნელობა აქვს. აქ შესაძლებელია და ძალიან ხშირია ნახევარ განაკვეთზე მუშაობა. მას შემდეგ, რაც დედა გავხდი, მეც 36 საათი ვმუშაობ. ზოგადად, სახელმწიფო ყველანაირად უწყობს ხელს სამუშაო პირობების გაუმჯობესებას. ასევე კანონი არეგულირებს მაქსიმალური სამუშაო საათების რაოდენობას. შესაბამისად, ჩამოყალიბდა სამუშაო კულტურა, სადაც შრომა და დასვენება ერთნაირად ფასდება.

იყენებ თუ არა შენს მრავალწლიან გამოცდილებას და უცხადებ თუ არა მხარდაჭერას ქალ კოლეგებს?

მე მჯერა, რომ ჩვენს შესაძლებლობებს სქესი არ განსაზღვრავს. მაგრამ მაინც გვიწევს ასეთ გარემოში ცხოვრება, სადაც პროფესიები დაყოფილია სქესის შესაბამისად. ზოგჯერ ისეც ხდება, რომ იდენტურ პოზიციაზე ქალის ანაზღაურება კაცთან შედარებით დაბალია. ბევრი კვლევის თანახმად, (ეს მარტო ჩემი აზრი არ არის) ზოგადად, ქალებს გვაკლია თავდაჯერებულობა და სწორედ ეს გვიშლის ხელს კარიერულ განვითარებაში. ჩემი გამოცდილებიდანაც, ძალიან ბევრჯერ ყოფილა შემთხვევა, როდესაც ბოლომდე არ ვაფიქსირებთ ჩვენს აზრს და არ ვითხოვთ იმას, რაც გვეკუთვნის. ბოლო რამდენიმე წელია, რაც აქტიურად ვარ ჩართული სხვადასხვა ინიციატივაში და პროექტში, რომელთა მიზანიც არის გავუზიაროთ ერთმანეთს გამოცდილება და გვერდში დავუდგეთ ქალ კოლეგებს, რომ მაქსიმალურად მოახდინონ საკუთარი თავის რეალიზება ჩვენს პროფესიაში. ფინანსურ სექტორში ეს გლობალურად მნიშვნელოვანი საკითხია და აღსანიშნავია, რომ დიდი ნაბიჯები გადაიდგა ამ მიმართულებით. არ შეიძლება არ აღვნიშნო, რომ სულ ცოტა ხნის წინ EY-იმ სწორედ ქალი წარადგინა, როგორც მომავალი აღმასრულებელი დირექტორი, CEO.

რა რჩევას მისცემდი საკუთარ თავს?

დღევანდელი გადმოსახედიდან ჩემს თავს სამ ძირითად რჩევას მივცემდი:

განსაზღვრე შენი კარიერული მიზანი – აუცილებელია გვქონდეს გარკვეული მიზანი, რაც დაკავშირებულია ჩვენი წარმატების ხედვასთან (success vision). ამ მიზნისკენ სწრაფვა და პატარ-პატარა წარმატებები ძალიან დიდი მოტივაციის წყაროა.

ჩადეთ დროითი ინვესტიცია უწყვეტ სწავლასა და განვითარებაში – მახსოვს ჩემს ბავშვობაში ასეთი სტერეოტიპი იყო – უმაღლესი განათლების მიღების შემდეგ სწავლის პროცესი სრულდებოდა. ჩემი გამოცდილებიდან ეს ასე სულაც არ არის. სწავლის პროცესი არ სრულდება, მეტიც საკუთარი თავის და უნარების განვითარება წარმატებული კარიერის განუყოფელი ნაწილია.

ნუ დატოვებთ დაუფასებლად თქვენი Networking–ის ღირებულებას – ადრეულ ეტაპზე არ ვაფასებდი სათანადოდ კონტაქტების ქსელის განვითარებას, ე.წ. Networking-ს. ახლა კი მივხვდი, რომ ძლიერი Networking-ი უზრუნველყოფს წვდომას მრავალ სხვადასხვა რესურსზე. და როცა ვამბობ რესურსებს, არ ნიშნავს მხოლოდ სამუშაო შესაძლებლობებს. ის ასევე იძლევა წვდომას ცოდნაზე, გამოცდილებაზე, ბიზნესპარტნიორობაზე და ა.შ.

უახლოესი მიზნები და შორეული გეგმები…

უახლოესი მიზანია, გადავდგა შემდეგი ნაბიჯი ჩემს კარიერულ ზრდაში, რომელიც ხდება პარტნიორი EY-ში. ეს ჩემი დიდი ხნის სურვილია, ვფიქრობ, ძალიან კარგ მაგალითს და მოტივაციას მივცემ ჩემს საერთაშორისო კოლეგებს. გარდა ამისა, აქტიურად ვარ ჩართული ქალი ლიდერობის სხვადასხვა ინიციატივებსა და აქტივობებში EY-ის ფარგლებში. ჩემი მიზანია, კიდევ უფრო გავაფართოო ეს როლი, გავუწიო მხარდაჭერა ახალგაზრდა ქალ კოლეგებს ლიდერობისკენ გზაზე.

რაც შეეხება შორეულ მიზნებს, ძალიან მინდა, რომ ჩემი აქ მიღებული გამოცდილებით დავეხმარო იმ ადამიანებს, განსაკუთრებით ქართველ გოგოებს, რომლებიც ახლა დგამენ პირველ კარიერულ ნაბიჯებს. ზუსტად არ ვიცი რა ფორმით იქნება ეს ყველაფერი, კონკრეტულ გეგმაზე ჯერ კიდევ სამუშაო მაქვს.

საერთაშორისო ბაზარზე რა სირთულეებთან მოგიწია გამკლავება შენი კარიერული განვითარების გზაზე?

ჩემთვის ყველაზე რთული პერიოდი იყო ნიდერლანდებში გატარებული პირველი წელი. ნამდვილად არ იყო ადვილი აქაურ სამუშაო კულტურასთან ადაპტაცია. სულ სხვა გარემო დამხვდა. საქართველოში ვმუშაობდი დიდ ბანკებთან და კორპორაციებთან, მაგრამ აქაური მასშტაბი სულ სხვაა. პირველივე კლიენტი, რომლის აუდიტზეც დავიწყე მუშაობა, იყო უმსხვილესი მულტინაციონალური კომპანია, ჯამური აქტივები დაახლოებით 400 მილიარდი ევრო. ამ ყველაფრის უკან კი ძალიან რთული ოპერაციები და პროცესებია. დრო დამჭირდა, რომ კარგად გავრკვეულიყავი კლიენტების ბიზნესში. ეს დრო ნამდვილად არ მიმაჩნია დაკარგულად, რადგან ძალიან დიდი ცოდნა შევიძინე.

პირველი ე.წ „კულტურული შოკი“ თუ გახსოვს, სამსახურში რომ მიხვედი ?

ეს კითხვა 10 წლის წინ რომ დაგესვათ, ალბათ ძალიან დიდი ჩამონათვალი მექნებოდა 😊 ჩვენი კულტურები ძალიან განსხვავდება ერთმანეთისგან, მაგრამ აქ გატარებული 10 წლის მერე ნიდერლანდურ კულტურასთან ძალიან დავახლოვდი. ასე რომ ის, რაც კულტურული შოკი იყო ჩემთვის, ახლა ძალიან ნორმალურია.

პირველი, რაც ყველაზე კარგად მახსენდება, იყო აბსოლუტურად ყველაფრის დაგეგმვა, პირადი დროისაც კი. მეგობართან ვიზიტიც კი წინასწარ უნდა დაგეგმო. ბოლო წუთებზე რაიმეს გაუქმება არასოდეს არის მიღებული და რეალურად განიხილება როგორც ცუდ მანერად.

პირველივე დღიდან სასიამოვნოდ გაოცებული დავრჩი ასაკოვანი ხალხის ცხოვრების ხარისხით. კულტურულ ღონისძიებებზე, სპორტულ დარბაზებში და რესტორნებში, ზოგადად, ყველგან შეხვდებით ასაკოვან ხალხს. ძალიან მაგარია, რომ ასეთი საპენსიო და სოციალური სისტემა არსებობს, რაც უზრუნველყოფს პენსიონერების და ასევე შეზღუდული შესაძლებლობების მქონე ადამიანების ცხოვრების ხარისხს. სამწუხაროდ, საქართველო ძალიან ჩამორჩება ამ კუთხით ევროპას.

დაბოლოს, აუცილებლად უნდა აღვნიშნო ნიდერლანდური პირდაპირობა. ისინი არ ერიდებიან თავიანთი აზრის გამოხატვას. მათგან მიღებული ღია უკუკავშირი და კრიტიკა, არც თუ ისე მარტივად მისაღებია სხვა ქვეყანაში დროებით მომუშავე ადამიანისთვის ე.წ. ექსპატებისთვის. სოციალურ ქსელშიც ბევრ ხუმრობას შეხვდებით ამ თემასთან დაკავშირებით.

რას ნიშნავს შენთვის წარმატება და რა არის საჭირო დღეს, ცხოვრების უკიდეგანოდ აჩქარებულ ტემპში, წარმატების მისაღწევად?

წარმატება ყველასთვის ინდივიდუალურია და დამოკიდებულია ჩვენს მიზნებზე. ჩემთვის წარმატება არ განისაზღვრება მხოლოდ იმით, თუ რამდენად შევძელი გარკვეული მიზნის მიღწევა. არამედ რამდენად სასიამოვნო, საინტერესო და სახალისო იყო ამ მიზნისკენ გავლილი გზა.

წარმატების მისაღწევად საჭიროა ვიცოდეთ, რა გვინდა და რა არის ჩვენი მიზანი, სწორად გამოვიყენოთ და განვავითაროთ ჩვენი შესაძლებლობები და, რაც მთავარია, ვიპოვოთ მოტივატორი, სხვა სიტყვებით რომ ვთქვათ, რა გვიბიძგებს. დღევანდელი აჩქარებული ცხოვრების ტემპი მოითხოვს, რომ ვიყოთ ინფორმირებულები, არ უნდა მოვახდინოთ მნიშვნელოვანი სიახლეებისა და ტენდენციების იგნორირება, უნდა ვიყოთ მოქნილები და შეგვეძლოს ცვალებად გარემოსთან სწრაფი ადაპტაცია.

დაბოლოს, ყველაფრის საფუძველი არის ჩვენი კეთილდღეობა, წარმატება არ არის მდგრადი ფიზიკური და გონებრივი კეთილდღეობის გარეშე.