პედრო ალმოდოვარი პენელოპე კრუზის მონაწილეობით ახალ ფილმს გადაიღებს

რამდენიმე დღის წინ პედრო ალმოდოვარმა დაანონსა ახალი ფილმი, „Madress Paralelas”, რომელშიც თავისი ფავორიტი ქალი მსახიობი, პენელოპე კრუზი  ითამაშებს. ფილმის მთავარი თემა ალმოდოვარის ყველაზე დიდი შემოქმედებითი ინსპირაცია – დედობაა.

როგორც ცნობილია, ფილმის გადაღებისთვის მზადება ოქტომბრის თვეში დაიწყება, უშუალოდ გადაღებები კი 2021 წლის თებერვალშია დაგეგმილი. პედრო ალმოდოვარის ძმისა და პროდიუსერის, აგუსტინ ალმოდოვარის განცხადებით, ესპანეთის კინოთეატრებში ნამუშევრის ჩვენება 2021 წლის ბოლოდან გახდება შესაძლებელი. ფილმის პრემიერა კი, სავარაუდოდ, კანის კინოფესტივალზე შედგება.

მიუხედავად იმისა, რომ მთავარი როლის შემსრულებელს, პენელოპეს ჯერ კონტრაქტზე ხელი არ მოუწერია, პროდიუსერის მიერ გამოცემა Variety-თვის მიწოდებული ინფორმაციით, მას მოეწონა სცენარი და მზად არის თანამშრომლობის დასაწყებად.

აგუსტინ ალმოდოვარი ასევე აცხადებს, რომ პედრო ფილმის სცენარზე წლების განმავლობაში მუშაობდა, საბოლოო ცვლილებები კი ნაშრომში თვითიზოლაციის დროს შეიტანა. წინასწარი ინფორმაციით ფილმი ორი დედის ცხოვრების შესახებ მოგვითხრობს, რომლებიც ერთსა და იმავე დღეს იმშობიარებენ.

საინტერესოა, რომ ალმოდოვარს განსაკუთრებული ურთიერთობა ჰქონდა დედასთან და მისი ფილმებიდან საუკეთესო მომენტებიც სწორედ სცენარისტის პირადი ისტორიითაა შთაგონებული.